ဘုရားအကြည့်အရှုကြွလာတဲ့အချိန်

ကျမ်းစာထဲမှာ အချိန်ကို ဖေါ်ပြတဲ့ ဂရိစကားလုံး ၃ ခုရှိပြီး 
အသုံးများတဲ့ ၂ ခုက Chronos နဲ့ Kairos ဖြစ်တယ်။ 
ခရောနော့စ်ဆိုတာ တနေ့၂၄ နာရီရှိပြီး ၁ နှစ်မှာ ၃၆၅ ရက်ရှိတဲ့ ပုံမှန်လည်ပတ်နေတဲ့အချိန်ဖြစ်တယ်။ Chronology ဆိုတဲ့ 
အင်္ဂလိပ်စကားလုံး ဒီကနေ ဆင်းသက်လာတယ်။ 

ခရောနော့စ် အချိန်အရ ဒီနေ့ဟာ ဧပြီလ ၁၀ ရက် ည ၇ နာရီဖြစ်တယ်။ ခိုင်းရော့စ်ဆိုတာက တိုင်းန်ုင်ငံ (သို့) လူတဦး အပေါ် ဘုရားသခင် အကြည့်အရှုကြွတဲ့အချိန်၊ အထူးကျေးဇူးပြုတဲ့အချိန်၊ထူးခြားတဲ့
အမှုကို ပြုပေးတဲ့အချိန်ဖြစ်တယ်။ ကျမ်းစာထဲက ခိုင်းရော့စ်
အချိန်တချို့ကို ‌ဝေမျှလိုပါတယ်။ 

"အချိန်ကာလစေ့သောအခါ (kairos) ... သားတော်ကို 
ဘုရား သခင် စေလွှတ်တယ်။"( ဂလာ ၄:၄-၅) 
 "ငါတို့သည်အကျိုးနည်းရှိနေစဉ် အချိန်တန်မှ (kairos) 
ခရစ်တော်သည်  အသေခံတော်မူ၏။" (ရောမ ၅:၇)

 ဘုရားသခင်ချိန်းချက်တဲ့အချိန်ကွက်တိမှာ ခရစ်တော်ကားတိုင် 
ပေါ်၌ အသေခံခဲ့တယ်။ ဒီအချိန်ဟာ ခိုင်းရော့စ်အချိန် ဖြစ်တယ်။ သင့်အသက်တာမှာ ဘုရားသခင် ထူးခြားတဲ့အမှုကို ပြုလိုတယ်။ 
ယခု သင့်ကို ကျေးဇူးပြုလိုပြီး သင့်အတွက် ခိုင်းရော့စ်အချိန် ဖြစ်တယ်။ 

ဒီအချိန်မှာ သင့်ဖက်က လုပ်ရမဲ့အရာတွေရှိတယ်။ ယခင်က ဘုရားပေးထားတဲ့ကတိတော်များ ပြည့်စုံလာမဲ့ အချိန်ဖြစ်တယ်။ 
ဒါကြောင့် ယခုအချိန်မှာ ဘုရားသခင်က သင့်ကိုအကြည့်အရှု ကြွလာတယ်။ သင့်အတွက် ခိုင်းရော့စ်အချိန်ဖြစ်တယ်ဆိုတာ ယုံကြည်ပါ။ 
သင့်စိတ်ထဲမှာ ဘုရားနှိုးဆော်တဲ့အရာကို လုပ်ဆောင်ပါ။ 

၁ ရာချုပ် ၁၂:၃၂-၄၀ မှာ ဣသခါလူမျိုးဟာ ဣသရေလနိုင်ငံအတွက် 
ဘုရားရဲ့ ခိုင်းရော့စ်အချိန်ဖြစ်မှန်း ပိုင်းခြား၍ သိကြတယ်။ ဒါတင်မကဘဲ သူတို့ဘာလုပ်ရမယ်ဆိုတာသိကြတယ်။ ဒါကြောင့် ဒါဝိဒ်ကို 
ဘုရင် အဖြစ် ချီးမြောက်ကြလို့ ဣသရေလနိုင်ငံရဲ့ ဘုန်းတန်ခိုးအကြီးမားဆုံးခေတ်ကို ရောက်ရှိစေခဲ့တယ်။ 

 တဖက်မှာလည်း.... ဣသရေလလူမျိုးများဟာ 
ယေရှုကြွလာချိန်မှာ ကာလအချိန်ကို မပိုင်းခြားတတ်ကြလို့ ပျက်စီးဆုံးရှုံးကြရတယ်။ ယေရှုက ယေရုရှလင်မြို့အတွက်ငိုကြွေးလျက် " 
သင့်ကို ကြည့်ရှု ပြုစုတော်မူသောကျေးဇူးကို မသိမမှတ်သောကြောင့် သင်၏ရန်သူတို့သည်သင့် ပတ်ပတ်လည်တွင် တပ်တည်၍ ....
သင်၌ ကျောက်တခုအပေါ်မှာ တခုမျျှထပ်ဆင့်၍ မကျန်ရစ်
စေရန် ပြုကြသောအချိန်ရောက်လိမ့်မည်" ဟု 
ပြောခဲ့တယ်။ (လုကာ ၁၉:၄၂-၄၄)

 ဘုရားသခင်အကြည်အရှုကြွလာတဲ့အချိန်ကို သိမှတ်လျက် 
ယုံကြည်ခြင်းအားဖြင့် သင့်အသက်တာမှာ ကတိတော်များ 
အံ့သြဖွယ် ပြည့်စုံလာတာတွေ့ရလိမ်မယ်။ သင့်အသက်တာမှာ ဘုရားပြုတဲ့ကြီးမားတဲ့အမှုကို မြင်ရလိမ့်မယ်။ သင်ထပါ။ 
အလင်းလင်းပါ။ ယခုပင် သင့်အတွက် kairos moment ဖြစ်တယ်။ 

 မယုံကြည်လို့ လက်မလွတ်ပါစေနဲ့။ ယုံကြည် ဝန်ခံလျက် ဘုရားနှိုးဆော်တဲ့အတိုင်းလုပ်ဆောင်လျက် ကြီးမားတဲ့အမှုကို 
မြင်တွေ့ပါစေ။ သင့်အားဖြင့် ဘုရားဘုန်းတော် ထင်ရှားပါစေ။